WORD WAR JUAN (Pilipino)

"Salita! Salita! Salita! Araw-araw salita; mula sa kanya, ngayon sa 'yo! Yan lang ba ang magagawa nyong mga perwisyo?"

'Yan ang isina-tagalog na awit ni Eliza, ginanap ng paborito kong aktres na si Audrey Hepburn, sa Broadway movie musical na "My Fair Lady."

Ganyan din bang sick-and-tired na pakiramdam ang nadarama mo pag nagbubukas ka ng Facebook? Maaasim na salita na parang tsunami ang dating. Minsan gusto mo na lang i-X ang mga ganyang post para makapagkape ka nang mahinahon.

Pero bakit nga Juan versus Juan ang mga pananalita natin? Baha na ang internet ng  tone-toneladang pagmumura at salitang galit. Tuloy, marami nang nag-unfriend ng mga kaibigan nila sa Facebook. May mga tuluyan nang nagsarado ng FB accounts nila.

Hindi na ba talaga pwedeng mag-komento ang isang tao hinggil sa state of affairs ng bansa natin, o tungkol sa hindi magandang asal ng mga opisyal? Bakit aatakihin ka ng iba dahil dito? At bakit kailangang ipagtanggol ang isang masamang nagawa? 

Bakit kailangang sirain ang isang komento hinggil dito?

At bakit kailangang mang-alipusta o magmura? Sa totoo lang, parehong panig―pro o con man―ay  guilty.

Subalit ito ang tunay na nakakainis: ang pagbaha ng sangkatutak na kasinungalingan, gawa ng mga tinatawag na trolls. Misyon ng mga trolls na palabuin ang katotohanan. Sa sama nang pagkakasulat ng mga inimbento nilang balita, kung iintindihin mo, madidiskubre mong ang mga ito ay kasinungalingan.  

Ito ang isa sa mga itinuro sa atin sa eskwela: na sa isang demokrasyang bansa, kung maglalahad ka ng opinyon, hindi ka dapat matakot na may pumula sa 'yo.

Sa kasalukuyan, napaka-hati ng ating bayan. Masyado tayong natali sa pagka-kanya-kanya o pagka-kampo-kampo, na hindi na bukas ang utak natin sa ibang pananaw. Walang turuan! 

Lahat tayo'y naging mapanghusga at  makitid ang isipan.

Bakit hindi na lang natin tingnan ang mga situwasyon ayon sa pananaw ng Panginoon?

Lahat tayo ay nagkasala, walang matuwid, Romans 3:23! Kaya walang makapagsasabing may isang taong puro tama ang gawa; kaya hindi dapat ipagtanggol kung ang isang tao ay mali na ang ginagawa―lalo kung ito'y malinaw na mali. Kahit pa siya ang presidente!

Kahanga-hanga ang president natin. Mahal niya ang bayan natin at hangad niyang mapabuti ang buhay ng mahihirap. Dapat tularan ang marubdob niyang pagnanasa na ibuwal ang lawless elements. Subalit walang isa man―presidente man siya o pulis―ang makapaghuhusga sa isang nagkamali maliban sa proseso ng due process at ng batas.

Hustisya at rule of law ang dapat masunod. Kung hindi, maraming inosente ang madadawit. Concern ito ng mga human rights groups. Subalit mas dapat tayong mabahala sa sinasabi ng Panginoon.

Makapangyarihan ang mga salita. Nagsalita ang Diyos at nalalang ang lahat. Kaya sabi ng biblia, "Ang buhay at kamatayan ay nasa pwersa ng dila," Proverbs 18:21. Ang mga salita ay nakaka-buhay o nakakasira.

Kaya bilang mananampalataya, hindi ako matahimik pag naririnig ko ang president natin na nagmumura, o nagsasalita nang pabalang at walang respeto sa iba. Napapanood natin siya araw-araw sa primetime TV. Pinapakinggan siya ng kabataan. Buong mundo ay nanonood!

Natutuhan ko sa paaralan na importate ang respeto para magtagumpay sa buhay. Ako ay isang guro, at halos araw-araw, ipinapaalala ko sa aking mga estudyante, "Maging magalang kayo," lalo na kung may nakikita akong nang-bu-bully.

Kaya umaasa din ako na maging magalang din ang ating president. Dapat makita ito ng mga kabataan sa kanya; kasi kung hindi, bakit pa natin ituturo ito? At saka, ang paggalang ay umaani rin ng paggalang ng iba. Kung ano ang itinanim, ito rin ang aanihin.

Gusto nating irespeto ng lahat hindi lang ang ating president kundi lahat ng Pilipino na nagsisikap  magtagumpay, nasa Manila, New York o Singapore man siya.

Ayaw nating umalis ang mga investors dito sa Pilipinas. Masyado silang nababahala pag ang lider ng bansang kinaroroonan nila ay astang champion ng "you and me against the world" na kaisipan.

Kasama tayo sa family of nations kaya kailangan nating matutong makipag-isa sa ibang bansa.    

"Sinumang na-ko-kontrol ng salita niya ay marunong, at siya na may mapagtimping ugali ay nakakaintindi," Proverbs 17:27.

Ephesians 4:29―Huwag bayaang lumabas sa inyong mga bibig ang corrupt na salita, kundi yun lamang mabuti para sa ikatataas ng iba, ayon sa okasyon, upang ito ay magbigay-grasya sa mga nakikinig.

Patuloy nating ipagdasal―hindi lamang para malaya tayong makapaglahad ng opinyon, kundi upang tayong mga Pilipino ay hindi makaramdam ng takot pag tayo'y nagsalita. Mas malaking dalangin natin: na hindi ipagbunyi sa bansang ito ang mali, at magsaya tayo sa mga tamang gawa.

Pilipino ako, taas-noong Pilipino. At patuloy kong ipagdarasal ang ating presidente at bansa.